Ah Leavin'.... (Sung in the style of 'Nah Leavin')

Apologies in advance to Denyse Plummer

AH LEAVIN..........(bastardized lyrics by the one and only PEA)

They say meh country so stressfull, so tense
With race hate, young jail bait, too much violence
Boy pack up and go, leave sweet Trinbago
I tell dem hell yeah (hell yeah)
How de people small-minded, macoscious and loud
Of bobol and scandal they boastful and proud
Yet somehow I see, all this foolery
As just the starting, it deteriorating

You see dey just tief mih tennis shoe
Nails, hammer and a tin of glue
mih full line of washed clothes too
Meh neighbor just tell me
Ah leaving (ah leaving)
Meh navel string so deep but dey might tief dat if ah fall asleep

Where else in de world you know
bullets flying po po po
People cussin' yuh so and so jus so in the street
Ah leaving (ah leaving)
Better believe mih ah fraid if ah stay here ah go dead

I see a people creative who ent come for fun
Make sawed off from old steel, turn pipe into gun
So why should I stay, it could be me there one day
I tell dem no way (no way)
Comradery so special just join up de gang
dey will teach you how to shoot and dey will teach you how to sprang
But doh think dey kind, iz one setta bad mind
So ah heading New York, hold all de old talk

You see ah just had to run back home
because ah leave mih poor dog there alone
and ah feel ah go have to moan
when dey tief he too
Ah leaving (ah leaving)
Meh navel string so deep but dey might tief dat if ah fall asleep

Where else in de world you see
even police does have to flee
when dem bad boys start to get on bad in town and city
Ah leaving (ah leaving)
Is here wey conceive me, but if ah stay here ah go dead

Mayaro, Maracas Bay (dey raping)
Savannah wey children play (dem shooting)
yuh old car yuh roller skate (dey tiefing)
de bicycle yuh leave by de gate (dey spranging)
De Oval, down in St. Clair (dey robbing)
dey mugging you without fear (and laughing)
Down in de carnival (pick pocketing)
De Soca Chutney Bachannal (bottle pelting)

I wake up one morning and before I stretch
mih bedspread mih pillow case ah realize ah get ketch
mih clothes and mih bag even mih dirty wash rag,
I getting outta here (outta here)
Humming birds and black birds used to sing in de trees
but now is only mosquito and one setta fleas
Wild dogs in de street, looking for meat
it bloody scary, dis place gone crazy

You see ah just watch ah football match
Wey Trini and Yankee clash
So much goal dem yankee lash
Meh head still dizzy
Ah leaving (ah leaving)
Meh navel string so deep but dey might tief dat if ah fall asleep

Where else in de world you know
Despite having money for so
Vagrants does have to bend down low and drink from ah drain
Ah leaving (ah leaving)
Is here wey conceive me, but if ah stay ah go dead

Barb wire, roll wire, we living in jail
And dey still getting through to share licks in we tail
we living in fear because dem bandits just doh care
I going home and pack (home and pack)
Dey tiefing all yuh silver dey tiefing all yuh gold
If yuh only play yuh standing still dey go tief yuh heart and soul
So who want to leave, because dey believe
Dat out dey easy, I say wait for me

You see ah just had to run outside
De wrecker nearly take mih ride
De man like he have no pride
and he watch mih cut eye

Ah leaving (ah leaving)
Meh navel string so deep but dey might tief dat if ah fall asleep
Where else in de world you know
Big man does get on so
Carrying on like a so and so for days in the street
Ah leaving (ah leaving)
Is here wey conceive me, but boy it get real, real dread

Mayaro, Maracas Bay (we hiding)
Savannah wey children play (we running)
De government corrupt for so (an tiefing)
Even de blasted bake and shark (dey faking)
De Soca and de Carnival (iz now a sex ting)
Ah fed up of de bacchanal (ah leaving)