Sailor Mas... (Bad Man Doh Cater)

Beat yuh drum, rattle and hum, play a mas selector;

The real ramajay start and dey breakin' heart so doh let dem ketch yuh.
Iz King Sailor, Fancy Dress and de Midnight Robber;
Takin' night to make day and dey come out to play in de people savannah.
Crack of de whip, buss de mark watch all man scatter;

Run 'way real fast, no time to lime or for talk and chatter.

Play yuh mas, beat yuh drum, stomp and holler.

De man with de plan takin' a stand and have all dem badjohn corner.
From early in the evening doh shout, doh holla;

Get on bad in de day but doh let nightime ketch yuh 

Grab de boys, grab de toys, iz a whole new theatre

Real gun man in town, no bad boys around, dem days over

Dey in de van, holding hands, everybody forever

Circus time, your friends and mine, sweating together

Short man in a fury bussin mark in a hurry say he know who have powder

Doh play dat with he, he was there and he see, and he side have their own dealer

King Liar distressed, stand up there in a dress and make dem cower

All who name man, stand up and make a stand now in de pressure cooker.

Play a mark, bus yuh head and go by de doctor

Get a bill, write yuh will and jump in de fire.

Baldhead square off facing King Liar like he doh fraid pressure

But behind he own back King Snake coming and he bringin' powder

Mark to buss, time to cuss, send for dead man water

Blades storming and raids forming from as far as Mecca.

Doh play de ass, send de Ras, he say he ent no traitor

King Snake steady, done make he plans a'ready and now he waiting fuh yuh
Glamorous fiends and preening Queens front and center

No time to fuss, de mark done buss, brace for fire
Beat yuh chest, east to west you is de new Godfather

Dock de ship, count de chips, time to smoke out viper

Hindu man fine, no more panty line, Teacher Teacher
Who doh hear go feel, so stop making deal before he come an teach yuh
Gopee sing a song, and all fall down so ease de pressure
Parents showing charm, raising alarm and hangin' banner
Emergency law, protest no more, hol' yuh corner
Airport man cheer, he staying right here, pay yuh lawyer
Baldhead real vex, leggo de text, out of order
Robes man say, dat eh no way to play, and we go send to get yuh
Baldhead say iz joke, he only blowin' smoke and he doh like fire
Well wheel and turn, before you get burn, bad man doh cater

Watching Crime, passing time, run de clip Director,
Some like wood so gih dem good, live on camera
Cut de show, tell him to go, doh play fella
Doh hut your head I comin' real dread, paid and sponsor
Venezuelan lime, having a time with mih Spanish pardner

Two bound a beef, no tears and grief just some Holy Water

From across de ridge we go build ah bridge south of de border

Finish roam, headin home, bring de helicopter

Ram de Ram man dress up real dan to come and meet ya

De boys in de car with an open bar and a side of tassa

Blow de horn, sing yuh song and wine back harder
Queenie man vex, he face showing stress, and he come to tell yuh
He saying race, tell dem brace, black chicken alone in de cooker

Make a wish, bring some fish, and make sure dey big eh

Nothing small, make de call, or we go wait to ketch yuh

Make a vote bus yuh throat Mis-tah Speak-ah

Ah beg to move, ah in a groove and it feelin' nicer
Take night to make day and it running away de Preacher tell yuh
He did it fuh curry and now he sorry he tell de media
Let dem know in advance if he get a next chance he go sure to do better

Bus de mark, make skylark but doh ketch de fever

Churchman war comin' fuh sure an' it lace with pepper

Gun man plot, ting getting hot, send for bailor

Sandy man come, Dandy man go, tension fadda

Sportsman in line, me love you long time, I go sign de paper

Deadwater man son iz de man with de gun and he have to answer

Robotman say he go make dem pay for de stress and pressure

American fuss, Canada buss, who to turn tuh

Play a mas, shake yuh ras, we doh fraid no powder

Tief a wine, join de line, all ah we playing Sailor...